टीकापुर घटनामा संलग्न लक्ष्मण थारु पक्राउ

कैलालीको टीकापुर घटनामा संलग्न भएको आरोपमा प्रहरीले लक्ष्मण थारुलाई पक्राउ गरेको छ । प्रहरीले भैरहवाको लुम्बिनी रोडबाट थारुलाई पक्राउ गरेको हो । मधेसी जनअधिकार फोरम लोकतान्त्रिकका केन्द्रीय सदस्य देवी चौधरीको घरबाट थारुलाई प्रहरीले पक्राउ गरेको संघीय समाजवादी फोरम नेपालका रुपन्देही जिल्ला अध्यक्ष महेन्द्र यादवले जानकारी दिनुभयो । यसैबीच, कैलालीको टिकापुरमा १७ दिनदेखि लागिरहेको कर्फ्यु आज ६ घण्टाका लागि खुला गरिएको छ । हिजो ५ घण्टा हटाइएको कर्फ्यु आज ६ घण्टा खुलाइएको हो । लगातारको कर्फ्युले जनजीवन कष्टकर बनेपछि स्थानीय प्रशासनले कफ्र्युको समय घटाउन थालेको जनाएको छ । कर्फ्यु हटेपछि बजारमा किनमेल गर्नेको भिड लागेको छ । धनगढीमा आज पनि तीनघण्टा मात्रै कर्फ्यु लाग्ने भएको छ । दिउँसो १२ देखि ३ बजेसम्म कर्फ्यु लगाउने स्थानीय प्रशासनको तयारी छ । वीरगंजमा पनि अहिले ९ देखि दिउँसो १ बजेसम्म कर्फ्यु हटाइएको छ । ९ दिनदेखि कर्फ्यु लागिरहँदा जनजीवन कष्टकर हुँदै गएकाले विस्तारै कर्फ्यु हटाउँदै लगेको स्थानीय प्रशासनले जनाएको छ ।