नेतासहित हजारौंले हेरे गोरु जुधाइ (फोटो र भिडियो)

श्रीधर पौडेल

२ माघ नुवाकोट । काठमाडौंको छिमेकी जिल्ला नुवाकोटको तारुकामा अघिल्ला वर्षजस्तै माघे संक्रान्तिका दिन बुधबार गोरु जुधाउने प्रतियोगिता सम्पन्न भएको छ । अघिल्लो वर्ष कांग्रेस, एमाले र एमाओवादी कार्यकर्तावीच मनमुटाव भई दुई स्थानमा गोरु जुधाइए पनि यस वर्ष भने सर्वदलीय सहमतिमा १९ हल गोरु जुधाइएको छ ।

प्रत्येक वर्ष हुने गोरु जुधाइ प्रतियोगिता यसपालि अन्य वर्षहरुमा भन्दा शान्तिपूर्ण र सहजरुपमा सम्पन्न भएको आयोजकले बताए । गोरु जुधाउने प्रतियोगिताको उद्घाटनका लागि कांग्रेसका केन्दि्रय नेता डा. रामशरणमहत, सभासद बहादुरसिंह लामा र रामकृष्ण यादवसमेत तारुका पुगेका थिए । एमाले र एमाओवादीलगायत विभिन्न दलका जिल्ला नेताहरु गोरु जुधेको हेर्न तारुकामा भेला भएका थिए ।

पर्यटकलाई आकर्षण गर्ने रोचक प्रतिस्पर्धा हेर्न नेपाल पर्यटन बोर्डका कर्मचारीहरु गाडी रिर्जभ गरेर केही पत्रकारसमेत बोकेर तारुका पुगेका थिए । गोरु जुधाइ प्रतियोगिता हेर्न स्थानीय जिल्लाबासी तथा राजधानीबाट समेत गरी हजारौं दर्शकको सहभागिता थियो ।

प्रत्येक वर्ष गोरु जुधाइ प्रतियोगितामा आफ्नो गोरु सहभागी गराउन र पुरस्कार जिताउन वर्षभरि गोरुलाई राम्रो दानापानी र घाँस खुवाउने प्रचलन नुवाकोटका किसानमा छ । आयोजकका अनुसार प्रतियोगितामा सामेल भएको गोरुले एउटा प्रतिस्पर्धीलाई जितेपछि अर्कोसाग जुधिरहनुपर्दैन । यही नियमअनुसार १९ हल गोरु जुधाइएकोमा १९ वटा गोरुलाई बिजेता घोषित गरिएको आयोजकले बताए ।

 

Source: Onlinekhabar