२८ वर्षपछि निगमले नयाँ जहाज भित्र्यायो, बाजागाजासहित स्वागत

निगमको नयाँ जहाज एमए ६० त्रिभुवन अन्तर्राष्ट्रिय विमानस्थलमा

१४बैशाख, काठमाडौं । राष्ट्रिय ध्वजावाहक नेपाल वायुसेवा निगमले २८ वर्षपछि नयाँ जहाज भित्र्याएको छ । चीन सरकारले अनुदानमा उपलब्ध गराएको ५८ सिटको ‘एमए ६०’ जहाज दिउँसो साढे १ बजे त्रिभुवन अन्तर्राष्ट्रिय विमानस्थलमा अवतरण भएको छ ।

आन्तरिक उडानका लागि ल्याइएको जहाजलाई विमानस्थलमा पञ्चेवाजा बजाएर स्वागत गरिएको थियो । जहाजलाई अमेरिकी पाइलटले त्रिभुवन विमानस्थलमा अवतरण गराएका थिए । जहाज अवतरण गर्दा निगमका कर्मचारीहरु निकै उत्साहित देखिएका थिए । जहाजलाई स्वागत गर्न पर्यटन सचिव सुशील घिमिरे, नेपाल नागरिक उड्डयन प्राधिकरणका महानिर्देशक रतिशचन्द्रलाल सुमन पनि विमानस्थल पुगेका थिए ।

वायुसेवा निगमले यसअघि सन् १९८६ मा आन्तरिक उडानका लागि एबीएक्स जहाज र सन् १९८७ मा अन्तर्राष्ट्रिय उडानका लागि बोइङ ७५७ विमान ल्याएको थियो । त्यसयता निगमले पुराना जहाजलाई मर्मत गर्दै उडान सञ्चालन गरिरहेको थियो ।

पाइलट तथा चिनियाँ प्रतिनिधिहरुलाई स्वागत गर्न बसेका पञ्चकन्या र निगमका कर्मचारीहरु

चीनले भोली ११ बजे नेपाल वायुसेवा निगमलाई जहाज हस्तान्तरण गर्ने कार्यक्रम रहेको प्रवक्ता रामहरि शर्माले जानकारी दिए । जहाज हस्तान्तरण गर्न जहाज निर्माता कम्पनी एभिक होल्डिङ इन्टरनेशनलका अध्यक्ष यु ग्वाङ क्वान शनिबार नै नेपाल आइसकेका छन् ।

मे १० बाट व्यवसायिक उडान शुरु गर्ने

जहाजलाई मंगलबार भैरहवाको गौतमबुद्ध विमानस्थलमा लैजाने कार्यक्रम छ । जहाज हस्तान्तरण गर्न आएका पाहुनालाई सोही जहाजमा राखेर भैरहवा लगी लुम्बिनी घुमाउने शर्माले बताए ।

जहाजले मे १० तारिखदेखि व्यवसायिक उडान शुरु गर्ने निगम प्रवक्ता शर्माले जानकारी दिए । ‘जहाजको भाडादर अझै तय नभए पनि १/२ दिनमा तय गरिन्छ’ उनले भने-’नयाँ जहाजले सुगम गन्तव्यहरु भैरहवा, भद्रपुर, धनगढी र विराटनगरमा उडान भर्नेछ ।’

चीनले निगमलार्इ ६ वटा जहाज दिँनेछ । चीन सरकारले निगमलाई एउटा एमए ६० सहित वाई १२ ई नामक १९ सिट क्षमताको जहाज अनुदानमा दिने सहमति गरेको छ । निगमलाई चीन सरकारले नै १९ सिट क्षमताका तीनवटा र ५८ सिट क्षमताको एउटा जहाज सहुलियत ऋणमा उपलब्ध गराउँदै छ ।

निगमका अनुसार अनुदानमा पाइने वाई १२ ई नामक जहाज असार १६ मा काठमाडौं आइपुग्ने छ । त्यस्तै, सहुलियत ऋणमा पाइने चारमध्ये एउटा एमए-६० असोज १४ गते र बाँकी तीनवटा वाई १२ ई जहाज कार्तिकसम्म नेपाल आइपुग्ने बताइएको छ ।

विमानस्थलमा जहाजलाई बाजा बजाएर स्वागत गरिँदै

पाइलटलाई माला लगाएर स्वागत गर्दै एक कन्या

जहाज आउँदा खुशीले उत्साहित भएका निगमका कर्मचारीहरु जहाजको फोटो खिच्दै

जहाजको प्रतिक्षामा बसेका निगमका कर्मचारी तथा पत्रकारहरुलाई हात हल्लाएर स्वागत गर्दै पाइलट

- Source: Onlinekhabar