भूकम्पपीडितहरु आक्रोश पोख्दै थिए, सरकार कहाँ छ ?

नारायण पंगेनी

१४ वैशाख, काठमाडौं पाटन बहुमुखी क्याम्पसको प्राङ्गणमा पुग्दा भूकम्पपीडितहरु आक्रोश पोख्दै थिए, सरकार कहाँ छ ? क्याम्पसको प्राङ्गणमा महिलाहरु खाना बनाउनमा व्यस्त थिए भने बालबालिका, वृद्धवृद्धादेखि युवाहरु चहल-पहल उस्तै थियो ।

भूकम्प प्रभावितहरु क्याम्पसको तीनतिरको भवन परिसरमा टेण्ट टाँगेर बसेका छन् । आफैं व्यवस्थापन गरी पाल टाँगेर बसेका उनीहरु भन्दै थिए, ‘बजारमा केही किन्न पाइँदैन । चिउरा किन्न पनि मुस्किल हुन थालिसक्यो ।’

घरबाट ल्याइएको राशन पानीले पुग्दासम्म खाने हो, त्यसपछि के खाने हो भन्ने उनीहरुको गुनासो छ । पाटनढोकामा भाडा बसेका काभ्रे बेबरकी चिनिमायाँ लामाको आक्रोश थियो, ‘हामीले के खायौं, के खाएनौं भन्ने चिन्ता कसलाई छ र ? सरकार कहाँ छ भन्ने हामीलाई थाहा छैन ।’

ग्यास सिलिण्डरसहित सबै सामग्री बोकेर पालमुनि पुर्‍याएकी धनकुमारी श्रेष्ठको आक्रोश पनि उस्तै थियो । उनले पनि तीन दिनदेखि खुला आकाशमुनि बस्दासमेत कोही सोध्न नआएको गुनासो गरिन् ।

‘भूकम्पले घर चर्किएको छ, घरमा बस्ने अवस्था छैन,’ धनकुमारीले भनिन्, ‘यसैगरी कहिलेसम्म बस्ने ?’ ललितपुरको पाटन क्याम्पस, ललितपुर उपमहानगरपालिकाको कार्यालय परिसर, मंगल बजार, बाग्मतीको नदी किनार तथा स्कुल क्याम्पस र खुला क्षेत्रमा पाल टाँगेर बस्दै आएका छ ।

शिविरमा खानेपानीको समस्या

स्कुल, क्याम्पस तथा खुला स्थानमा अस्थायी टहरा बनाएर बसेका भूकम्प प्रभावितहरुलाई बस्ने समस्या त छँदैछ, दैनिक उपभोग्य वस्तुको अभाव र खानेपानीको समस्या पनि विकराल बनेको छ ।

एक साताअघि घरमै धारामा थापेको पानी बोकेर शिविरसम्म ल्याएका छन् । उनीहरुले प्रदुषित पानी सिधै पिउने गरेका छन् । स्वच्छ खानेपानीको समस्याले गर्दा महामारी फैलिनसक्ने सम्भावना बढेको छ ।

           

तस्वीरः श्रीधर पाैडेल/अनलाइनखबर

Source: Onlinekhabar