बन्दको अवज्ञा गरेको भन्दै बसमा तोडफोड

कैलाली, २३ जेठ
कैलालीको पथरिया गाउँ विकास समिति–१ पथरियामा मुक्त कमलरीहरुले बन्दको अवज्ञा गरेको भन्दै दुई वटा बसमा तोडफोड गरेका छन् ।
आज विहान टीकापुरबाट धनगढी जाँदै गरेको सुदूरपश्चिम बस व्यवसायी संघको ना ४ ख ४०३४ नम्बरको बस र काठमाण्डौबाट टीकापुर आउदै गरेको कर्णाली रिभर साईडको ना ४ ख ४६९४ नम्बरको बसमा तोडफोड गरेका हुन् । तोडफोड बाट बस पूर्ण रुपमा क्षति ग्रस्त भएको इलाका प्रहरी कार्यालय टीकापुरका प्रहरी नायव उपरीक्षक भेषराज श्रेष्ठले जानकारी दिनुभयो । मानविय क्षेति भने भएको छैन ।
मृतक सृजना चौधरीलाई कमलरी राख्ने ललितपुरका युबराज पौडेल र शंकर अधिकारीलाई पक्राउ गरि कारबाही गरिनु पर्र्ने,मृतक चौधरीका परिवारलाई राहत तथा आन्दोलनका क्रममा घाइतेलाई उपचार गराउनुपर्ने लगायत माग राख्दै मंगलबारदेखि तराइका २२ जिल्ला बन्दको घोषणा गरेका थिए । बन्दले आज पनि कैलालीको जनजीवन प्रभावित भएको छ । विहानै देखि कुनै पनि सवारी सधानहरु सञ्चालनमा आएका छैनन । भने बजार कलकारखाना बन्द रहेका छन् ।