महाबु लेकबाट चिहाउँदा (फोटो फिचर) ~ सुन्दर सुदुर पश्चिम, सम्बृद्ध सुदुर पश्चिम

Wednesday, January 1, 2014

महाबु लेकबाट चिहाउँदा (फोटो फिचर)

10:25 AM No comments

शब्द/तस्वीर- भरतबन्धु थापा

महाबुको लेकबाट सैपाल हिमालको दृश्य हेर्नलाई जब अमृत भादगाउँले, अनुराग बासु र म पुग्यौं, तब महाबुको लेकलाई बादलले ढपक्कै ढाक्यो । ढुंगैढुंगाको बाटो भएर नाककै डाँडीजस्तो उकालो पार गरेर महाबुको लेक पुग्दा तगारो बन्यो बादल ।

कालीकोट र दैलेखको सीमानामा पर्ने महाबुको लेक दैलेखको सबैभन्दा उच्च स्थान हो । समुन्द्री सतहबाट ४ हजार मिटर भन्दा पनि उचाइमा रहेको महाबु लेक पहिला-पहिला यातायात सञ्चालन नहुँदा सुर्खेतबाट जुम्ला जाने मार्गको सबैभन्दा उच्च स्थानको कठिन गन्तव्य मानिन्छ ।

महाबुको लेकबाट अपी एवं सैपाल हिमालको मनोरम दृश्य मात्र नभएर मौसम सफा भएका बेला बर्दियाका फाँटहरुसमेत हेर्न सकिन्छ । महाबुको लेकमा महादेबको मन्दिरसमेत रहेको छ ।

महाबुको लेकमा जनै पुणिर्माको समयमा मेला लाग्ने गर्दछ । मेलामा जुम्ला, कालीकोट, दैलेख, सुर्खेत र बाँकेसम्मका भक्तजनहरु मेलामा आउने गर्दछन् । महाबुको लेकमा अवस्थित महादेवको दर्शन गरेपछि आफ्नो मनोकांक्षा पूरा हुन्छ भन्ने जनविश्वास रहेको छ ।

यतिबेला दैलेख र कालीकोटबाट महाबुतिर जाने मोटरबाटो खन्ने काम भइरहेको छ । निकै चाँडै नै यो बाटो जोडिएपछि महमबु लेकमा आन्तरिक पर्यटनको उल्लेखनीय उपलब्धि हुने छ ।

महाबु लेक

दैलेख जिल्ला पञ्चकोशी तीर्थस्थलका रुपले पनि प्रख्यात रहेको छ । पञ्चकोशी तीर्थस्थमा श्रीस्थान, नाभिस्थान, धुलेश्वर, पादुका र कोटिला पर्दछ । श्रीस्थानमा र नाभिस्थानमा ज्वाला रहेको छ । दैलेख नेपाली भाषाको पहिलो अभिलेख भएको जिल्ला पनि हो । तर, यसको उचित संरक्षण तथा प्रचार-प्रसार हुन नसक्दा सो अभिलेखले चर्चा पाउन सकेको छैन ।

नारायण नगरपालिको भुर्तीमा पर्ने बाइस देवलहरु पनि ऐतिहासिक रुपले निकै महत्वपूर्ण रहेका छन् । विश्व सम्पदासूचीको क वर्गमा परिसक्दा पनि स्थानीय तथा सरोकार निकाएको उचित पहल नहुँदा देवलहरु उचित संरक्षित हुन सकेका छैनन् । पुरातत्वले देवलहरुलाई काँडेतारले बेरे पनि देवलका ढुंगा यत्रतत्र छरिएका छन् भने केही ढुंगाहरु झरिसकेका छन् ।