सुदूरमा पहिलो पटक हाफ म्याराथन

योगेश रावल कैलाली, चैत १५ 

सुदूरपश्चिममा पहिलो पटक धनगढी जेसिजले धनगढी हाफ म्याराथन प्रतियोगिता २०१४ आयोजना गर्ने भएको छ। 

 

धनगढी जेसिजले आज पत्रकार सम्मेलनको आयोजना गरी नयाँ वर्षको अवसर पारेर बैशाख १ गते प्रतियोगिता आयोजना गर्ने जानकारी दिएको छ। 

 

'सबैका लागि खेलकुद' भन्ने नाराका साथ क्षेत्रीय रंगशालाबाट सुरु हुने प्रतियोगितामा सुरक्षाकर्मी, कर्मचारी, व्यवशायी लगायत ५ सयको सहभागीता रहने धनगढी जेसिजका कार्यकारीणी उपाध्यक्ष प्रकाश चन्दले जानकारी दिएका छन्। 

 

उनले प्रतियोगिता जित हारका लागि भन्दा पनि एकआपसमा सौहार्द वातावरण तयार पार्नका लागि आयोजना गरिन लागेको बताए। 

 

प्रतियोगितामा धावक बैकुण्ठ मानन्धर, किर्तिमानी खेलाडी दीपक बिष्ट, एथ्लेटिक्सतर्फ पहिलो अन्तराष्ट्रिय पदक विजेता जीतबहादुर केसीको सहभागिता रहनेछ। 

 

धनगढी गृह क्षेत्र भई नेपाली चलचित्र क्षेत्रका स्थापित नायकद्वय विराज भट्ट र सुमन सिंह तथा नायीका ऋचा शर्मा लगायतको समेत प्रतियोगितामा सहभागिता रहने बताईएको छ।

 

प्रतियोगिताको अवसरमा धनगढी जेसिजले खेलाडी र कलाकारहरुलाई सम्मान समेत गर्ने कार्यकारिणी उपाध्यक्ष चन्दले जानकारी दिएका छन्।  

 

प्रतियोगितामा प्रथम हुनेलाई १५ हजार, दोस्रो हुनेलाई १० हजार र तेस्रो हुनेलाई ५ हजार नगद सहित ट्रफी र प्रमाण पत्र समेत प्रदान गरिने बताईएको छ।