घुम्न जाऔं बर्दिया (फोटोफिचर)

शब्द/तस्वीर- भरतबन्धु थापा

बर्दिया राष्ट्रिय निकुञ्जमा देखिएको बाघ । तस्वीरः राजन चौधरी

बर्दिया तराईको सबैभन्दा ठूलो राष्ट्रिय निकुन्ज रहेको जिल्ला हो । ९ सय ६८ वर्ग किलोमिटर क्षेत्रफलमा फैलिएको यो निकुन्ज पाटे बाघ लगायत वन्यजन्तु हेर्नका लागि सबैभन्दा उपयुक्त स्थान मानिन्छ । नेपालको सबैभन्दा लामो नदी कर्णाली र बबईको बीचमा निकुन्जको केही भाग पर्ने भएकाले यो स्थान जनावरका लागि उपयुक्त स्थल बनेको छ ।

बर्दिया निकुन्जको ७० प्रतिशन भू-भाग साल र यसका सहायक प्रजातिको वनले ढाकिएको छ । बाँकी ३० प्रतिशत भागमा घाँसे मैदान रहेको छ । निकुन्जमा ५४ प्रजातिका स्तनधारी, ४ सय प्रजातिका चराचुरुंगी, २५ प्रजातिका घस्रने वन्यजन्तु र ६० भन्दा बढी प्रजातिका माछा पाइन्छन् ।

पश्चिम नेपालको प्रवेशद्धार नेपालगन्जबाट दुई घण्टामा सहजै पुग्न सकिने यस निकुन्ज महेन्द्र राजमार्गको अम्बासबाट जम्मा १३ किलोमिटर टाढा रहेको छ ।

अम्बासदेखि राष्ट्रिय निकुन्जसम्मको बाटो कच्ची भएका कारण पर्यटकालाई समस्या भएको बताउँछन् पर्यटन व्यवसायी एवं थारु होमका सञ्चालक मोहन चौधरी । उनी भन्छन्-’अहिले बाटो बनाउने भन्ने कुरा उठेको छ, यदि यो बाटो बनेमा बाह्य पर्यटक मात्र नभएर आन्तरिक पर्यटकको समेत वृद्धि हुने सम्भावना छ ।’

त्यस्तै अर्का नेपाल वाईल्ड लाईफ होटलका भीम शाहीका अनुसार बर्दिया राष्ट्रिय निकुन्ज नजिकै भारत रहेकाले यहाँ भारतीय पर्यटकलाई आकषिर्त गर्न सके नेपाललाई थप फाइदा पुग्न सक्छ । यसका लागि राज्यले उचित नीति बनाए राम्रो हुने शाहीको सुझाव छ ।

बर्दियामा राष्ट्रिय निकुन्ज आसपास थारु संस्कृतिका लागि निकै प्रख्यात छ । बर्दियाको भादगाउँमा सञ्चालित होम स्टे पनि आन्तरिक तथा बाह्य पर्यटकका लागि थप आर्कषण मानिन्छ ।

बर्दिया राष्ट्रिय निकुन्ज नजिकै रहेको ठाकुरद्वारा मन्दिर पनि धार्मिक हिसाबले प्रख्यात छ । मध्यपश्चिमकै धार्मिक स्थलमध्ये एक मानिने ठाकुरद्वारा मन्दिरमा लिच्छबीकालीन मूर्तिहरु रहेका छन् । बिशेष गरी माघे संक्रान्त्रिमा त्यहाँ मेला लाग्ने गर्दछ ।

Source: Onlinekhabar