भुकम्पको २४ घण्टा बितिसक्दा पनि धादिङमा उद्दार भएन - पीडित भन्छन्-मर्ने मरिहाले, बाँचेकाको छिटो उद्दार होस्

१३ वैशाख, धादिङ । भुकम्पको केन्द्रविन्दु गोरखाको छिमेकी जिल्ला धादिङका दुर्गम गाउँमा उद्दारमा ढिलाइ भएको छ । घाइतेहरुले छिटो उद्दार गरी औषधि उपचार गरी आफूहरुको ज्यान जोगाइदिन आग्रह गर्दै आएका छन् ।

धादिङका री, मुलपानी, झर्लाङ्दी, मार्पाक लगायतका धेरै गाविस प्रभावित भएका छन् । मूलपानी गाविस ३ बाट सुशील बस्नेतले टेलिफोन गरी आफ्नो परिवारका ४ सदस्यको मृत्यु भएको र दुई जना गम्भीर घाइते भएको जानकारी दिए । वरपरका एक सयभन्दा धेरै घर भत्किएकाले अरु धेरैको मृत्यु भएको हुनसक्ने उनले बताए ।

पीडित भन्छन्-मर्ने मरिहाले बाँचेकाको छिटो उद्दार होस्

९८१८४४२३८१ नम्बरबाट अनलाइनखबरमा फोन गरी उनले मुलपानी लगायतका ठाउँमा बिचल्ली भएकाले तत्काल उद्दारका लागि सरकारी निकायलाई भनिदिन आग्रह गरे ।

‘खानेकुरा केही नभएर हिँजोदेखि भोकै छौं, मर्ने मरिहाले हामी बाँचेकाको छिटो उद्दार गरिदिन सरकारलाई भनिदिनुपर्‍यो,’ उनले अनलाइनखबरलाई भने ।

‘धादिङमा १५० को मृत्यु’

धादिङका प्रमुख जिल्ला अधिकारी बासुदेव घिमिरेका अनुसार धादिङका हालसम्म १५० जनाको मृत्यु भएको छ । अरु १५० जना गम्भीर घाइते छन् ।

३२ जनालाई हेलिकोप्टरबाट उपचारका लागि काठमाडौं पठाइएको र ५० जनाको जिल्ला अस्पताल धादिङमा उपचार भैरहेको घिमिरेले जानकारी दिए । उनले धादिङका दुर्गम क्षेत्रमा हेलिकोप्टरबाट उद्धारको काम भैरहेको जानकारी दिए । ‘शनिबार राति अबेरसम्म पानी परिरहेकाले दुर्गम क्षेत्रमा गाडी जान नसक्दा समस्या भयो, हेलिकोप्टरमार्फत् उद्धारको काम गर्दैछौं,’ घिमिरेले अनलाइनखबरलाई भने ।

धादिङका जमीन ठाउँ ठाउँमा फाटेका छन् । तर पृथ्वी राजमार्गमा भने क्षति भएको छैन । भुकम्प आउँदा पहिरो झरेर बाटो अबरुद्ध भएका स्थानमा डोजर प्रयोग गरी बाटो खुलाइएको छ ।

Source: Onlinekhabar